„Осигуреник"- правно или физичко лице чијa законска одговорност е осигуренa;
АКЦИОНЕРСКО ДРУШТВО ЗА ОСИГУРУВАЊЕ ЕУРОЛИНК СКОПЈЕ
УСЛОВИ
за задолжително осигурување на сопствениците на бродови и чамци на моторен погон од одговорност за штети предизвикани на трети лица
Воведни одредби
Одделни изрази употребени во овие Услови за задолжително осигурување на сопствениците на бродови и чамци на моторен погон од одговорност за штети предизвикани на трети лица (во натамошниот текст: Услови) го имаат следното значење:
„Осигурувач" - Акционерско друштво за осигурување ЕУРОЛИНК Скопје, ул.27-ми Март бр.2;
„Договарач на осигурување" - лице кое со осигурувачот склучило договор за осигурување;
„Осигуреник"- правно или физичко лице чијa законска одговорност е осигуренa;
„Осигурен случај"- настан што може да доведе до остварување на оштетно побарување од страна на оштетениот;
„Корисник"- сопственик на брод односно чамец на моторен погон и секое физичко или правно лице што по воља на сопственикот фактички располага со бродот, односно кому бродот односно чамецот му е даден на користење;
„Сума на осигурување" - износ на кој е осигуренa одговорноста на осигуреникот и воедно највисокиот износ на обврската на осигурувачот по полисата;
„Премија"- износ кој договарачот на осигурување го плаќа по договорот за осигурување;
„Полиса" - исправа за договорот за осигурување;
„Оштетено лице“ – лице кое претрпело штета од употребата на бродот односно чамецот на моторен погон;
„Брод односно чамец на моторен погон “ – видови пловни објекти, и тоа: брод, чамец, глисер, скутер и јахта со сила на мотор над 1,125 киловати, запишани во регистарот на бродови односно во регистарот на чамци, без оглед на нивната намена – јавен превоз или превоз за сопствени потреби;
„Екипаж на брод“ - лица натоварени на бродот за извршување на работи на бродот задолжително запишани во пописот на екипажот;
„Персонал на брод" – лица што работат на пловниот објект кои не се членови на екипажот;
„Патник" - секое лице кое се превезува со бродот односно чамецот на моторен погон кое не е член на екипажот или на персоналот на пловниот објект;
„Внатрешни води"- сите водени површини погодни за пловидба (езера, канали и реки);
„Закон“ – Закон за задолжително осигурување во сообраќајот (Сл.весник на РМ бр.88/05, 71/06, 81/08,47/11 и 1356/11).
Член 1- Обем на покритие
(1) Осигурувачот е во обврска, врз основа на полисата за осигурување, да ја надомести штетата согласно со прописите за надомест на штета, ако при употребата на бродот односно чамецот на моторен погон наведен во полисата, а поради одговорност на неговиот корисникот е предизвикана смрт, телесна повреда, нарушување на здравјето, како и уништување или оштетување на предмети на трето лице, освен за штети на предметите примени за транспорт.
(2) Не се сметаат за трети лица, односно осигурувањето не се однесува на сите лица кои во време на случување на штетниот настан се наоѓаат на пловниот објект без оглед на нивното својство: патниците кои се превезуваат со бродот, односно со чамецот на моторен погон, лицата кои по налог на корисникот на бродот, односно чамецот на моторен погон или за негова сметка, работат на извршување на транспортот (екипаж и персоналл на брод, односно на чамец на моторен погон).
(3) Покрај одговорноста на корисникот, осигурена е одговорноста на секое лице кое по волјата на корисникот работи на бродот односно чамецот (екипаж на бродот, персонал и сл.), како и на лицата што се превезуваат во бродот односно чамецот.
(4) Договорената осигурена сума претставува горна граница на обврските на осигурувачот за сите давања по еден штетен настан, доколку поинаку не е договорено, без оглед на бројот на оштетените лица. Повеќе временски поврзани штети, ако настанале поради иста причина, претставуваат еден осигурен случај.
(5) Ако во време на настанување на осигурениот случај, со Закон пропишаната сума на осигурување на која мора да се склучи договорот за осигурување е повисока од договорената, се смета дека осигурувањето е склучено на пропишаната сума на осигурување која била во важност во време на склучување на договорот.
Член 2 -Промена на сопственокот на бродот односно чамецот или на регистарските податоци
(1) Ако во текот на траењето на осигурувањето по полисата се промени сопственикот, односно, корисникот на осигурениот брод односно чамец, правата и обврските од договорот за осигурување од одговорност преминуваат врз новиот сопственик, односно корисник и траат до истекот на тековниот период за осигурување.
(2) Сопственикот на бродот односно чамецот е должен да го извести осигурувачот за промена на регистарските податоци на осигурениот брод односно чамец во рок од 15 дена од денот на настанатата промена.
Член 3 -Исклучување од осигурување
(1) По основ на осигурувањето од одговорност на сопственикот на бродот односно чамецот на моторен погон исклучени се оштетните побарувања:
1.на сопственикот, сосопственикот, заедничкиот сопственик и секој друг корисник на бродот односно чамец со кој е предизвикана штетата за штетите настанати поради уништување или оштетување на предмети,
2.на лицето кое управувало со бродот односно чамецот со кој е предизвикана штетата како и на неговите роднини и други лица за штета поради смрт или телесни повреди на лицето кое управувало со бродот односно чамецот,
3.на лица кои на недозволен начин го присвоиле бродот односно чамецот како и на соучесниците на нелегалното присвојување,
4.што се однесуваат на предмети доверени на осигуреникот или на некое друго осигурено лице, а особено ако тие предмети корисникот ги превезува, користи или чува;
5.на оштетени лица чија штета настанала:
- при употреба на бродот односно чамецот на спортски приредби во кои целта е постигнување на најголема или најголема просечна брзина, како и на вежби за приредбата,
- поради дејство на нуклеарни енергија за време на чување и превоз на радиоактивни материјали,
- поради воени операции, побуни и граѓански немири, како и поради терористички акти дефинирани согласно со кривичниот закон.
(2) Ако посебно не е договорено, од осигурителното покритие се исклучени оштетните побарувања кои произлегуваат од штетен настан што настанал за време додека бродот односно чамецот бил мобилизиран или реквириран од страна на властите во мирно време и тоа од моментот на пристигнување на првото определено место до моментот на превземање на бродот односно чамецот.
Член 4-Губење на правата од осигурување
(1) Осигуреникот ги губи правата од осигурување ако со бродот односно чамецот управува неовластено лице. За неовластено лице во смисла на овие услови се смета лице кое :
1. со бродот односно чамецот управува без соодветна дозвола за управување - бродска книшка односно уверение за оспособеност за управување со чамец или ако му е изречена мерка на безбедност или заштитна мерка забрана за управување со брод односно чамец, или без присуство на овластено лице се обучува за управување со брод односно чамец. Не се смета за управување без соодветна дозвола, ако на лицето кое управува со бродот односно чамецот не му е продолжена дозволата по истек на рокот на важност, а до денот на штетниот настан не го изгубило правото на продолжување на важноста на истата.
2. со бродот односно чамецот управува под дејство на алкохол, дрога, психактивни лекови или други психоактивни супстанци. Се смета дека лицето што управува било под дејство на алкохол, дрога, психактивни лекови или други психоактивни супстанци ако:
- со анализа на крвта или друг метод на мерење се утврди дека имал повеќе од 0,1 %о (промили) алкохол во крвта, присуство на дрога или други психоактивни лекови или супстанци,
- со стручен преглед се утврдат знаци кои покажуваат дека е под дејство на алкохол, дрога, психоактивни лекови или други психоактивни супстанци,
- одбива или избегнува да се подвргне на испитување на алкохолизираноста, или одбива да даде крв за утврдување на степенот на алкохолизираност или присуство на дрога односно други психоактивни лекови или супстанци, освен ако земањето на крв не го загрозува неговото здравје (на пр. хемофилија),
- по штетниот настан консумира алкохол, дрога или други психоактивни лекови и супстанци, така што го оневозможи утврдувањето на присуство на алкохол односно дрога во крвта во моментот на настанување на штетата.
(2) Правата од осигурување ги губи осигуреникот кој овозможил со бродот односно чамецот да управува лице под околностите од претходниот став на овој член.
(3) Правата од осигурување ги губи осигуреникот кој штетата ја причинил намерно.
(4) Права од осигурувањето во смисла на овој член нема лицето кое неовластено го користело односно управувало со бродот односно чамецот, без знаење и одобрение на осигуреникот, како и лицето кое противправно се послужило со истите.
(5) Осигуреникот кој ги губи правата од осигурувањето по основ на ставот (1), (2) и (3) на овој член, како и лицето од ставот (4) на овој член, должно е да го надомести износот што осигурувачот го исплатил како надомест на штета на трети лица предизвикана со употребата на бродот односно чамецот под околностите наведени во претходните ставови на овој член, заедно со xxxxxx и трошоците.
(6) Ако не е платена дополнителна премија за зголемен ризик, осигуреникот ги губи правата од осигурување за секој осигурен случај во сразмер помеѓу платената премија и премијата што требало да се плати.
Член 5-Обврски на осигуреникот
(1) Осигуреникот има обврска, спрема своите можности, да му помогне на осигурувачот во утврдување на одговорноста за штетниот настан. Тој е должен во рок од 3 дена од настанување на штетниот настан, да му даде на осигурувачот вистинити и исцрпни податоци за настанот и сите околностите под кои се случил.
(2) Ако против осигуреникот е истакнато оштетно барање, поднесена е тужба за надомест на штета, поставено е имотно правно побарување или е поднесен предлог за обебзедување на докази, тој е во обврска, без одлагање, за тоа да го извести осигурувачот и да му ги достави сите документи што ги содржи соодветното барање. Осигуреникот е должен водењето на парницата да го препушти на осигурувачот.
(3) Осигуреникот е должен обработувањето на оштетното побаруввање да го препушти на осигурувачот и нема право да го одбие, а особено нема право да го признае оштетното побаруввање, освен ако тоа со тоа не се прави очигледна неправда.
(4) Договарачот на осигурувањето, односно осигуреникот е должен сите свои известувања упатени на осигурувачот писмено да ги потврди, а сособено за промена на името, називот и адреса.
(5) Осигурувачот има право на регрес на сите исплатени надоместоци или трошоци кои не би биле исплатени доколку осигуреникот ги исполнувал обврските од претходните ставови на овој член.
Член 6-Обврски на осигурувачот
(1) Осигурувачот е должен да ги подмири основаните барања и да превземе мерки за заштита на осигуреникот од неосновани или претерани оштетни барања. Ако осигурувачот ја повреди оваа обврска должен е на осигуреникот да му ја надомести штетата настаната со непостапувањето.
(2) Осигурувачот е овластен во име на осигуреникот да ги дава сите изјави, кои според негово мислење се потребни заради надомест на штетата, или заради заштита од неосновани или претерани барања.
(3) Трошоците за одбрана на осигуреникот во кривична постапка ги надоместува осигурувачот само во случај кога изрично дал согласност за бранител и се обврзал за надомест на трошоците.
(4) Трошоците на паричната постапка ги надоместува осигурувачот доколку парницата ја водел осигуреникот во согласност со осигурувачот, или ако бил застапуван од лице што го одредил осигурувачот и тоа во полн износ без оглед на висината на осигурената сума.
Член 7-Територијално важење на осигурувањето
Осигурителното покритие, ако поинаку не е договорено, се однесува за пловидба по внатрешните води на територијата на Република Македонија.
Член 8 - Почеток и престанок на осигурително покритие
(1) Обврската на осигурувачот од договорот за осигурување започнува по истекот на 24 часот на денот што во исправата за осигурување е наведен како почеток на осигурување, ако до тој ден е платена премијата, односно по истекот на 24 часот на денот кога премијата е платена, освен ако поинаку не е договорено.
(2) Обврската на осигурувачот престанува по истекот на 24 часот на денот што во исправата за осигурување е наведен како ден на истек на осигурувањето.
(3) Во случај на одземање на дозволата на осигурувачот за вршење работи на осигурување во класата на задолжителното осигурување на одговорност од употреба на пловни објекти, осигуреникот е должен да склучи договор за задолжително осигурување од одговорност со друго друштво за осигурување, и тоа со времетраење до истекот на периодот на осигурување кое преостанува според тековниот договор. Новиот договор за осигурување осигуреникот е должен да го склучи во рок од 30 дена од денот на објавување на решението за одземање на дозволата на осигурувачот во Службен весник на Република Македонија, на кој ден и престанува да важи договорот за задолжително осигурување.
(4) Премијата за осигурување по новиот договор се пресметува пропорционално за преостанатиот временски период согласно со договорот што престанува.
Член 9-Утврдување на премија
Премијата за осигурување ја утврдува осигурувачот врз основа на овие услови и тарифата на премии за задолжително осигурување на сопствениците на бродови и чамци на моторен погон од одговорност за штети предизвикани на трети лица.
Член 10-Плакање на премија
(1) Договарачот на осигурување премијата ја плаќа при преземање на полисата, ако поинаку не е договорено.
(2) Договарачот на осигурување премијата ја плаќа на свој ризик и трошок.
(3) Ако премијата е платена во пошта или во банка како ден на плаќање се смета денот кога премијата правилно е уплатена.
Член 11-Враќање на премија
Во случај на одјавување на бродот односно чамецот од соодветниот регистар, поради уништување, расходување, кражба или ставање во мирување, осигурувачот е во обврска да врати дел од платената премија, за преостанатото време на траење на осигурувањето ( про рата темпоре), сметано од денот на приемот на барањето за откажување на договорот, доколку до тогаш не се остварил осигурен случај.
Член 12-Писмена форма
(1) Договорот за осигурување е полноважен само ако е склучен во писмена форма.
(2) Сите известувања и изјави што се даваат по одредбите на договорот за осигурување мора да бидат дадени во писмена форма.
Член 13-Вонсудско решавање на спорови
(1) Сите лица кои имаат правен интерес што произлегува од договорот за осигурување склучен според овие услови, првенствено ќе настојуваат сите свои евентуални спорови со осигурувачот кои се во врска со предметниот договор за осигурување да ги решат спогодбено, во согласност со правилата на осигурувачот за xxxxxxxxx решавање на спорови.
(2) Доколку договарачот на осигурувањето, осигуреникот и оштетеното лице не се задоволни со одлуката на осигурувачот, истите можат да поднесат приговор до осигурувачот, кој е должен во рок од 15 дена до подносителот да достави писмена одлука по приговорот.
(3) Приговорот се доставува во писмена форма до седиштето на осигурувачот, во подружницата каде е склучен договорот, во подружницата каде ошетеното лице има живеалиште односно седиште и преку интернет на веб страницата на осигурувачот.
(4) Доколку спорот не е решен во постапката по приговор, секоја од страните во спорот може да и предложи на другата страна поведување на постапка за посредување согласно со прописите што ја уредуваат постапката за посредување.
Член 14-Судска надлежност
Во случај на спор помеѓу договарачот на осигурувањето, односно осигуреникот и осигурувачот надлежен е стварно надлежниот суд според местото на склучување на договорот за осигурување.
Член 15-Право на жалба
Осигуреник или договарач на осигурувањето, доколку е физичко лице, има право да поднесе жалба против осигурувачот, како и против осигурителното брокерско друштво, друштвото за застапување во осигурување и застапникот во осигурувањето, доколку преку некој од нив го склучил договорот за осигурување, до Агенцијата за супервизија на осигурување, како орган надлежен за супервизија на друштвата за осигурување,
Член 16-Право на претставкa
(1) Во случај кога договарачот на осигурувањето, осигуреникот, односно оштетеното лице смета дека осигурувачот не се придржува кон одредбите од договорот за осигурување, истиот може да достави претставка до:
1. Комисијата за постапување по претставки во седиштето на осигурувачот;
2. службата за внатрешна ревизија на осигурувачот;
3. организацијата за заштита на потрошувачи и
4. Агенцијата за супервизија на осигурување.
(2) Осигурувачот е должен да се произнесе по претставката доставена од подносителот во рок од 30 дена од денот на поднесување на претставката.
Член 17
Овие услови стапуваат на сила и се применуваат од 28.06.2012 година, на кој датум се донесени од Одборот на директори на осигурувачот, на 84 –та редовна седница.
Овие Услови за задолжително осигурување на сопствениците на бродови и чамци на моторен погон од одговорност за штети предизвикани на трети лица се донесени на 84-тата редовна седница на Одборот на директори на Акционерското друштво за осигурување ЕУРОЛИНК Скопје, одржана на ден 28.06.2012 година, со Одлука број 0202-7051/13, со примена од истиот ден.