Mədəniyyət. 2.1. Tərəflər mədəniyyət sahəsində əməkdaşlıqdan məmnunluq bildirdilər və aşağıdakı sahələrdə əlaqələrin genişləndirilməsi barədə razılığa gəldilər: 2005-ci ildə İran İslam Respublikasında Azərbaycan mədəniyyəti və 2006-cı ildə Azərbaycanda İran mədəniyyəti günlərinin keçirilməsi məqsədilə danışıqların aparılması; 2005-ci il ərzində Bakıda İran və Tehranda Azərbaycan rəssamlarının əsərlərindən ibarət sərgilərin təşkili; İran İslam Respublikasında keçirilən teatr festivallarında Azərbaycan teatr kollektivlərinin iştirakının təmin edilməsi; İran İslam Respublikasında inqilabın ildönümü ilə bağlı hər ilin fevral ayında keçirilən müsəlman ölkələrinin muğam və milli musiqi festivalında Azərbaycan incəsənət ustalarının iştirakı; hər iki ölkənin milli kitabxanalarının ədəbiyyat, tarix və mədəniyyət ilə bağlı kitablarla zənginləşdirilməsi məqsədilə qarşılıqlı kitab mübadiləsi, həmçinin iqtisadi inkişaf üzrə kitabların çapı; Azərbaycan və İranın qabaqcıl kitabxana və muzey işçilərinin, habelə bərpası rəssamlarının qarşılıqlı təcrübə mübadiləsini aparmaq; xxxxx Xxxxxxxxxx Azərbaycanda yubiley kitabının nəfis şəkildə nəşr edilməsi; tarix və mədəniyyət abidələrinin qorunması, təbliği, konservasiyası və bərpası sahəsində təcrübə mübadiləsi aparmaq məqsədilə Azərbaycan və İran mütəxəssislərinin hər iki ölkədə görüşlərini təşkil etmək; Azərbaycanda İranın, İranda Azərbaycanın tarix və mədəniyyət abidələrinə dair fotosərgilər təşkil etmək; Azərbaycanda İran filmləri və İranda Azərbaycan filmləri festivallarını keçirmək; İran tərəfi ilə əldə edilmiş razılığa əsasən Şəhriyarın həyat və yaradıcılığına həsr edilmiş sənədli və 12 seriyalı bədii filmlərin birgə çəkilişini təşkil etmək.
