FORSTÅING AV OPPDRAGET. Oppdraget går ut på å utarbeide eit forslag til ei allmenn lov om foreiningar i samsvar med Nærings- og fiskeridepartementets mandat. Vi forstår Oppdraget slik at det ikkje berre er ein lovtekst som skal utarbeidast, men at det skal utarbeidast ein rapport som også skal innehalde prinsipielle drøftingar og merknader til dei enkelte føresegnene. Rapporten skal med andre ord har det formatet som vi kjenner frå tradisjonelt lovarbeid, slik at den skal kunne tene som høyringsdokument. I dette ligg også at det må gjerast greie for økonomiske og administrative konsekvensar i samsvar med Utgreiingsinstruksen. Etter mandatet er det ikkje krav om at ein skal gjere nærmare greie for gjeldande, ulovfesta foreiningsrett. I tilknyting til dei enkelte spørsmåla som skal drøftast, kan det likevel etter omstenda vere grunn til å undersøkje gjeldande rett og reise spørsmål om det er grunn til å endre denne. Mandatet legg heller ikkje opp til at ein skal gjere greie for utanlandsk rett, men er samtidig ikkje til hinder for at løysingar og erfaringar frå utlandet blir trekt inn i arbeidet. Lova skal leggje godt til rette for organisering av foreiningsverksemd. Formålet med lova skal ikkje vere å ivareta behovet for offentleg styring og kontroll, men å stimulere til foreiningsverksemd gjennom eit enklare og betre regelverk enn dagens ulovfesta foreiningsrett. I samsvar med dette bør reglane i hovudsak vere fråvikelege. Som utgangspunkt bør reglane berre vere ufråvikelege i den grad det er nødvendig for å ivareta særtrekka ved foreiningsforma og omsynet til mindretalsmedlemmar, kreditorar, tilsette og eventuelle andre tungtvegande tredjepartsinteresser. Som ledd i lovarbeidet bør det også vurderast om lova berre skal vere eit tilbod om regulering, dvs. at det skal vere opp til kvar einskild foreining å ta stilling til å om det er ønskjeleg å bli omfatta av lova. Slik vi oppfattar mandatet, blir det lagt opp til at det skal utarbeidast éi, allmenn lov som skal kunne nyttast av alle foreiningar. Alternativt kunne ein tenkje seg at det skulle utarbeidast ei lov for dei store foreiningane og ei for dei små, eventuelt at det vart gitt eigne lover for ulike slag foreiningar. Dersom det skulle bli aktuelt å utarbeide meir enn eitt lovforslag, går vi ut frå at dette først må avklarast med departementet. Lova skal vere kort, enkel og lettfatteleg, og skal berre regulere sentrale spørsmål. Samtidig er det grenser for kor kort ei lov kan vere dersom den skal kunne gi tillitspersonar, med...
